ژمارەیەك پەرلەمانتاری كوردستان هۆشداریدەدەن لەو مەترسییانەی كە لەسەر ژیانی چالاكوانانی بادینان هەن و ڕایدەگەیەنن، “زیندانییانی بادینان پاش ئەوەی ئەحكامی مەرجەكانی ئازادكردنی مەرجدار دەیانگرێتەوە، بەڵام بەداخەوە بە مەبەست و پێشێلكردنی یاسا لە كونجی زینداندا هێڵدراونەتەوە”.
ئەو پەرلەمانتارانە لە ڕاگەیەندراوێكدا كە ئەمڕۆ سێشەممە بڵاویانكردووەتەوە “ماوەی 26 ڕۆژە زیندانییانی بادینان مانیانگرتووە و دۆخی تەندروستی بەشێكیان ناجێگیرە و ژیانیان لە مەترسیدایە، لەبەر ئەوە دەبوو بەڕێوەبەری چاكسازيی گەورانی هەولێر ئەركی خۆی ڕاپەڕاندایە“.
ئاماژە بەوەشكراوە، “بەپێی یاسای داواكاریی گشتی دەبێت داواكاریی گشتی بێلایەنانە كارەكانی خۆی ئەنجامبدات و ئێمە لە ئەندامانی پەرلەمانی كوردستان داوا لە سەرۆكایەتیی داواكاریی گشتی دەكەین لێكۆڵینەوەی جددی لە چاكسازیی گەورانی هەولێر بكات بەهۆی كەمتەرخەمییەكانییەوە”.
