مامۆستایەکی زانکۆی سلێمانی ڕووەکێکی نوێی لە ناوچەی شارباژێڕ دۆزیوەتەوە و وەک دەڵێت، ڕووەکەکە ناوی “نیپیتا”یە و تا ئێستا لە جیهاندا تۆمارنەکراوە.
پرۆفیسۆری یاریدەدەر دکتۆر کارزان عومەر قادر لە زانکۆی سلێمانی ڕایگەیاند، لە ناوچەی شارباژێڕ ڕووەکێکیان دۆزیوەتەوە کە لە جیهاندا نییە، ڕووەکەکە زیادکردنێکە بۆ سەر خێزانی ڕووەکەکان لە جیهاندا.
بەپێی وتەی ئەو پرۆفیسۆرەی زانکۆی سلێمانی، ئەوان بەدواداچوون و لێکۆڵینەوەیان کردووە سەبارەت بە بوونی ڕووەکەکە لە جیهاندا، بۆ ئەو مەبەستەش تیمێکی هاوبەشیان لەگەڵ زانکۆکانی عێراق و کۆماری ئیسلامیی ئێران پێکهێناوە.
ئەنجامی لێکۆڵینەوە و بەدواداچوونەکانیان دەرکەوتووە، ڕووەکەکە تا ئێستا تۆمارنەکراوە و یەکەمجارە بدۆزرێتەوە، لە خێزانی ڕووەکی نەعنا و جاترەیە، جۆرێکی دەگمەنە لە جیهاندا.
