تیمی پارێزەرانی زیندانییانی بادینان داوا لە وەزارەتەكانی كار و ناوخۆ دەكەن كەسانی مەدەنی لە ئیداری چاكسازییەكاندا دابنێن.
تیمی پارێزەرانی داکۆکیکار لە ڕۆژنامەنووس و چالاکوانانی سزادراوی بادينان لە پەیامێكدا بۆ وەزیرانی كار و كاروباری كۆمەڵایەتی و ناوخۆ دەڵێن، بەپێی یاسا دەبێ ئیدارەی چاکسازی لە دەست فەرمانبەری مەدەنی-دا بێت نەک ئەفسەری سەربازی، هەروەک لە هەموو چاکسازییەکانی گەوران و ئافرەتان و منداڵان لە سەرتاسەری هەرێمی کوردستاندا گشت بەڕێوەبەرەکان فەرمانبەری مەدەنین و سەر بە وەزارەتی کار و کاروباری کۆمەڵایەتی-ن.
دەشڵێن، “ناکرێت و سەرپێچیی یاسایە کە بەڕێوەبەرایەتیی چاکسازیی گەورانی هەولێر لە دەست ئەفسەری سەربازی بێت”.
پارێزەران داوا لە هەردوو وەزیری تایبەتمەند دەكەن ئەو بەڕێوەبەرایەتییە بگەڕێندرێتەوە بۆ وەزارەتی کار، تا لەژێر سایەی یاسا و ڕێنماییە بەرکارەكانی ئەو وەزارەتەدا ئیشوکارەکانی سزادراوان و پێشکەشکردنی خزمەتگوزاری و مامەڵەکردن لەگەڵ سزادراوان و کەسوکاریان و پارێزەرانیان بە ڕێڕەوی یاسایی خۆیدا بڕوات.
