وەزارەتی كاروباری شەهیدان دەڵێت، كاریان لەسەر گەڕاندنەوەی 171 شەهیدی جینۆسایدكراو كردووە، بەڵام سەرەتا بڵاوبوونەوەی كۆرۆنا و دواتریش ژمارەیەك پەرلەمانتار و كەسوكاری ئەنفالكراوان ڕێگربوون لە گەڕاندنەوەیان.
وەزارەتی كاروباری شەهیدان و ئەنفالكراوان لە ڕوونكردنەوەیەكدا ڕایگەیاند، لە ساڵی 2019 و لەكاتی دۆزینەوەی ژمارەیەك گۆڕی بەكۆمەڵ لە بیابانی سەماوە و بە دیاریكراوی لە ناوچەی (تل الشیخیە)، بەڕێوەبەرایەتی گۆڕە بەكۆمەڵەكانی وەزارەت بەهەماهەنگی دەزگای شەهیدانی عێراق تیمەكانیان ناردە شوێنی گۆڕەكان و بەشداربوون لە هەڵدانەوەی گۆڕەكان و گواستنەوەی ڕوفاتی (171) شەهیدی جینۆسایدکراو بۆ پزیشكی دادی بەغداد بەمەبەستی ئەنجامدانی شیكاری و گرتنەبەری ڕێكارە یاسایی و زانستیەكان و دواتر هێنانەوەیان بۆ كوردستان.
دەشڵێت، “بەڵام بەهۆی سەرهەڵدان و بڵاوبوونەوەی پەتای كۆرۆناوە بۆ ماوەیەك ئەو كارە دواكەوت، پاش ڕەوینەوەی ئەو پەتایە وەزارەتمان بەهەماهەنگی لەگەڵ لایەنە پەیوەندارەكانی حكومەتی هەرێمی كوردستان، ئامادەكاری پێویستی ئەنجامدا بۆ هێنانەوەی شكۆمەندانەی ڕوفاتەكان و بەخاكسپاردنەوەیان لە زێدی خۆیان”.
لە مانگی ئازاری ئەمساڵدا جارێكی دیكە شاندی وەزارەتەكە سەردانی دەزگای شەهیدانی عێراقی كرد و بڕیاردرا لەماوەیەكی نزیكدا لە ڕێوڕەسمێكی شایستەدا ئەو ئەركە نیشتمانیە بگاتە ئەنجام، وەك ئەوەی لە ڕوونكردنەوەی وەزارەتەكەدا هاتووە.
سەبارەت بە ڕێگرییەكانیش دەڵێت، ژمارەیەك پەرلەمانتاری كورد و ژمارەیەك بەناوی كەسوكاری قوربانیان نامەی ناڕەزاییان لە گەڕاندنەوەی ڕوفاتەكان داوەتە دەزگای شەهیدانی عێراق، كە ڕازی نین بەو ڕێكارانەی پێشتر گیراونەتەبەر بۆ هێنانەوەی ڕووفاتی شەهیدانی گۆرەبەکۆمەڵەکان و شەهیدانی جینۆسایدكراو و گرفتیان بۆ ئەو پڕۆسەیە دروستكرد.
وەزارەتی كاروباری شەهیدان و ئەنفالكراوان جەخت لەسەر پێویستی گەڕاندنەوەی ئەو (171) ڕوفاتە دەكاتەوە دەشڵێت، هەموو ئامادەكارییەكیشی بۆ ئەم مەبەستە ئەنجامداوە.
