دەیان پەنابەری سوری کە دەیانەوێت لە ڕێگەی وڵاتی تورکیاوە بگەنە وڵاتانی ئەوروپا و بەرەو تورکیا بەڕێدەکەون ڕووبەڕووی توندوتیژیی جەستەیی دەبنەوە لەلایەن تۆڕە ئێرانییەکانی بەقاچاخبردنەوە، لەکاتێکدا دەیانەوێت لە سنووری ئێرانەوە بگەنە تورکیا.
بەپێی ئەو گرتە ڤیدیۆییانەی لە تۆڕە کۆمەڵایەتییەکانی تورکیا و بەتایبەت تویتەر بڵاوبووەتەوە، “تۆڕە ئێرانییەکانی بەقاچاخبردن ئەشکەنجەی جەستەیی پەنابەرەکان دەدەن، لە یەکێک لە گرتە ڤیدیۆییەکاندا گوێی یەکێک لە پەنابەران دەبڕن”، ئەو قاچاخچییانە ڤیدیۆکان دەنێرنەوە بۆ کەسوکارەکانیان و هەڕەشەیان لێدەکەن و داوای پارەی زیاتریان لێدەکەن لەبەرامبەردا.
لە گرتە ڤیدیۆییەکاندا دەردەکەوێت، زۆرینەی ئەو پەنابەرە سورییانە دەستیان بەستراوەتەوە و ئەشکەنجەدەدرێن، ئەو گەنجە سورییەی گوێی دەبڕدێت لە گرتە ڤیدیۆییەکەدا دەردەکەوێت کە داوای 10 هەزار دۆلاری ئەمریکی دەکەن لەبەرامبەر ڕزگارکردنی کوڕەکەیان.
بەپێی سەرچاوەکان، خێزان و کەسوکاری ئەو پەنابەرانە ئامادەیی پیشاندەدەن بۆ ناردنی ئەو بڕە پارەیە لەبەرامبەر ڕزگارکردنی منداڵەکانیان، لەگەڵ ئەوەشدا بەشێکیان دەستبەرداری بیرۆکەی چوون بۆ تورکیا دەبن و ڕوودەکەنە هەرێمی کوردستان.
ئاژانسی هەواڵی “میزۆپۆتامیا”ی کوردی کە بەزمانی کرمانجی پەخشدەکات، بۆ یەکەمجار ڤیدیۆی ئەو پەنابەرانەی بڵاوکردەوە و لەماوەیەکی کەمدا تۆڕە کۆمەڵایەتییەکانی داگیرکرد، لە ڤیدیۆکەدا ژمارەیەکی زۆر گەنجی سوری دەبینرێن کە لەنێوان بەردی گەورە و ژێر سێبەری بەردەکاندا بە دەستبەستراوی ئەشکەنجە دەدرێن.
باس لەوە دەکرێت لە سێ ڕۆژی ڕابردوودا لەلایەن یەکێک لە تۆڕەکانی بەقاچاخبردنەوە زیاتر لە 12 پەنابەری سوری بەسەختی بریندارکراون بەهۆی ئەشکەنجەدانیانەوە.
