یەكێتی لە یادی داگیركردنی شەنگال و جینۆسایدكردنی ئێزدییەكان لەلایەن داعشەوە، داوای ئاوەدانكردنەوەی شەنگال دەكات، دوورخستنەوەی ئێزدییەكانیش لە بەکارهێنانیان وەكو كارتی سیاسیی جۆراوجۆر دووپاتدەكاتەوە.
سبەینێ 8/3 ساڵیادی هێرشی داعش بۆسەر شەنگال و داگیركردنی ناوچەكە و جینۆسایدكردنی ئێزدییەكانە، مەكتەبی سیاسیی یەكێتیی نیشتمانیی كوردستان لەوبارەیەوە پەیامێكی بڵاوكردەوە.
دەقی پەیامەكەی مەكتەبی سیاسیی یەكێتی:
لە یادی کارەساتی جینۆسایدی کوردانی ئێزدی و پەلاماردانی شەنگال و دەوروبەری لەلایەن چەکدارانی تیرۆریستی داعشەوە، سەری ڕێز و نەوازش بۆ قوریانییانی ئەو کارەساتە دائەنەوێنین.
هەر لەم یادە کارەساتبارەدا وێڕای ئەوەی ئەو ناوچانە لە چنگی زوڵم و زۆری چەکدارانی داعش ڕزگارکراون و بەشێک لەو کەسانەی بە دیل و کەنیزەک ڕفێنرابوون، ڕزگاریان بووە و ئازادکراون، هەوڵ و کۆششەکانی ئێمە لە یەکێتیی نیشتمانیی کوردستان بۆ ئەوەیە هەوڵەکانی ھەموو لایەک بە حکومەتی ئیتحادی و حکومەتی ھەرێمی کوردستان و حزب و لایەنە کوردستانی و عێراقییەکان چڕتر بکرێنەوە، بۆ دۆزینەوە و سۆراغی ئەوانەی کە لە کارەساتەکەوە تاوەکو ئێستا بێسەروشوێنن، هەروەها کاری جدی بکرێت لەپێناو ئاوەدانکردنەوەی زیاتری گوند و شارۆچکە و شوێنی نیشتەجێوونی ئێزدییەکان و لە ژیانی ناو کامپ و ئاوارەیی و بەکارهێنانیان وەک کارتی سیاسیی جۆراوجۆر ڕزگاربکرێن و ژیانێکی ئاسوودە و فەراهەمیان بۆ دابینبکرێت، کار و دەسەڵاتی شیاویان لە دەزگا ئیدارییەکانیاندا پێبدرێتەوە، تاوەکو لە برین و ناهەموارییەکانی سات و ڕۆژەکانی کارەساتەکەیان ساڕێژبکرێتەوە.
ئەرکێکی تر کە لەسەرشانی هەمووانە، ئەوەیە کە هەوڵەکانی پاراستنی ئێزدییەکان و ناوچەکانیان زیاتر بخرێنەگەڕ، تا لە هەر هەڕەشە و پەلاماردانێکی تر، کە ببێتە مەترسی لەسەر ژیانیان، پارێزراو بن.
مەکتەبی سیاسی
یەکێتیی نیشتمانیی کوردستان
