سەرۆكی فراكسیۆنی یەكێتی لە ئەنجومەنی نوێنەرانی عێراق ڕایدەگەیەنێت، ئەگەر چێوەی هەماهەنگی و ڕەوتی سەدر نەگەنە ڕێككەوتن هەڵبژاردنی پێشوەختە تەنها چارەسەرە بۆ دەربازبوونی وڵات لەو دۆخە چەقبەستووەی تێیكەوتووە.
هەرێم كەمال ئاغا سەرۆكی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عێراق لەلێدوانێكدا بە تۆڕی میدیایی ئێستای ڕاگەیاند، ڕەوشی ئێستای عێراق ناتەندروستە و گرفتەكە یەكترقبوڵنەكردن و یەكترشكاندنە و جگەلەوەش سووكایەتیكردن بە پەرلەمان كە دەزگای یاسادانانە لە وڵاتدا دۆخەكە دەخاتە ژێر پرسیارەوە.
ئاماژەی بەوەشكرد، ئەوەی جێگای خۆشحاڵییە لێدوان و هەڵوێستی چێوەی هەماهەنگیی شیعەكانە كە نایانەوێت دۆخەكە بەرەو ئاڵۆزیی زیاتر بچێت و داوای هێوربوونەوەی دۆخەكە دەكەن.
ئاشكرایكرد، پێشتر عادل عەبدولمەهدی سەرۆك وەزیران دەستیلەكاركێشایەوە و هەڵبژاردن ئەنجامدرایەوە و حكومەت و سەرۆك كۆمار هەڵنەبژێردراون و ئەگەر لایەنە شیعەكان نەگەنە ڕێككەوتن ئەنجامدانەوەی هەڵبژاردن تەنها چارەسەرە بۆ دەربازبوونی وڵات لەم دۆخە چەقبەستووەی تێیكەوتووە و پێویستە كورد نێوماڵی خۆی ڕێكبخاتەوە.
