بەهۆی تەقەلێكردنیانەوە لەلایەن هێزەكانی ئێران كۆڵبەرێكی خەڵكی ڕۆژهەڵاتی كوردستان كوژرا و چواری دیكە برینداربوون.
كاتژمێر 3ی بەرەبەیانی ئەمڕۆ هێزە چەكدارەكانی ئێران لە سنووری سەرتەزێنی شاری بانە تەقەیان لە ژمارەیەک کۆڵبەر کرد، لە ئاکامدا كۆڵبەرێك كوژرا و چواری دیكە برینداربوون.
ڕێكخراوی مافی مرۆڤی هەنگاو ڕایگەیاند، كوژراوەكە ناوی (شێرکۆ چاوشین)ی تەمەن 35 ساڵە و خەڵکی گوندی ورچەکی بانە-یە.
قوربانییەكە خێزاندار و باوکی منداڵێکە.
ڕێكخراوەكە ڕوونیشیكردەوە، چوار كۆڵبەرەكەی دیكە (بێهزاد خەڵکی مەریوان، محەممەد خەڵکی سەقز، هەژار خەڵکی بانە و دانا شەعبانی خەڵکی بانە)ن و قاچیان بە سەختی برینداربووە، ئێستا لە نەخۆشخانەی سەڵاحەدینی ئەیوبیی شاری بانە لەژێر چاودێریی پزیشکیدان.
