وەزیری تەندروستیی هەرێم ڕایدەگەیەنێت، عێراق سەرسامە بە هەرێمی كوردستان لە شێوازی چارەسەركردنی تووشبووانی شێرپەنجە و ئەو كەسانەی كە لە نەخۆشخانەكانی شێرپەنجە چارەسەر وەردەگرن.
د.سامان بەرزنجی وەزیری تەندروستیی هەرێم لە كۆنگرەیەكی ڕۆژنامەوانیدا كە بەبۆنەی كردنەوەی نەخۆشخانەیەكی ئەڵمانیی تایبەت بە كۆرۆنا لە سلێمانی ڕێكخرابوو ڕایگەیاند، ئەڵمانیا بەردەوام هاوكاریی هەرێمی كوردستان بووە لە دابینكردنی خزمەتگوزارییە تەندروستییەكاندا.
ئاماژەی بەوەشكرد، كردنەوەی ئەو نەخۆشخانەیە بۆ سلێمانی خزمەتێكی گەورە بە شارەكە دەكات و دەتوانرێت بۆ نەخۆشییە گوازراوەكانی دیكە سوودی لێوەربگرێت.
سامان بەرزنجی ڕاشیگەیاند، لە ماوەی ڕابردوودا شاندێكی باڵای وەزارەت سەردانی بەغدادیان كردووە و بەرپرسانی وەزارەتی تەندروستیی عێراق سەرسامی خۆیان بۆ شێوازی چارەسەركردنی تووشبووانی شێرپەنجە لە نەخۆشخانەكانی هەرێمی كوردستان دەربڕیوە كە نەخۆش و تووشبووانی شێرپەنجە لە دەرەوەی هەرێمی كوردستانەوە چارەسەردەكرێن.
