كەتیبەكانی حزبوڵڵا لەبارەی هێرشەكەی سەر كۆرمۆرەوە هەڵوێستی خۆی ڕاگەیاند و داوای لێپێچینەوە لە ئەنجامدەرانی دەكات.
كەتیبەكانی حزبوڵڵای عێراق لەبارەی هێرشە مووشەكییەكەی دوێنێ دووشەممەی سەر كێڵگەی غازی كۆرمۆر لە سنووری ناحیەی قادركەرەم هاتەدەنگ و ئەنجامدەرانی بە تاوانكار ناودەبات.
جەعفەر حوسەینی وتەبێژی كەتیبەكانی حزبوڵڵای عێراق ڕایگەیاند، گرووپی تاوانكاری لە ڕێگالادەر بە مووشەك هێرشیكردووەتەسەر كێڵگەی كۆرمۆر لە سلێمانی و هەوڵدەدەن لەو ڕێگەیەوە دۆخەكە بشێوێنن و ئاژاوە بنێنەوە.
وتەبێژی كەتیبەكانی حزبوڵڵای عێراق لە تویتەر نووسیویەتی، “حكومەتی كاربەڕێكەر و دەزگا ئەمنییەكان ئەگەر جددین، دەبێت ئەركی خۆیان لە ئاست ئەو پەرەسەندنە ئەمنییە بەجێبهێنن و ڕووبەڕووی ئەو گرووپانە ببنەوە و لێپێچینەوەیان لەگەڵدا بكەن.
ئێوارەی دوێنێ دووشەممە سێ مووشەك ئاراستەی كێڵگەی غازی كۆرمۆر كران و سەرچاوەیەكی ئاگادار لەنێو كۆمپانیای دانەغاز بە تۆڕی میدیایی ئێستای ڕاگەیاند، بە شێوەیەكی گشتی هێرشەكە زیانی ئەوتۆی لێنەكەوتووەتەوە.
