وەزیری شارەوانی و گەشتوگوزاری حکومەتی هەرێم ئاشکرایدەکات، ئاژانسی جیکای ژاپۆنی چەند پڕۆژەیەکی خزمەتگوزاری لە بواری تۆڕی ئاو و نۆژەنکردنەوەی لە هەولێر و سلێمانی و هەڵەبجە ئەنجام دەدات.
ساسان عەونی، وەزیری شارەوانی و گەشتوگوزاری حکومەتی هەرێم لە ڕاگەیەنراوێکدا دەڵێت، ” بە گوژمەی زیاتر لە شەش ملیۆن دۆلار چەند پرۆژەیەكی خزمەتگوزاری لە سلێمانی و هەڵەبجە جێبەجێ دەكرێن و بەمزووانە گرێبەستی پرۆژەی باشكردنی ئاوی خواردنەوە لە هەرێمی كوردستان تایبەت بە سنووری سلێمانی و هەڵەبجە واژوو دەكرێت”.
لە هەمان کاتدا وەزارەتی شارەوانی و گەشتوگوزار ڕێککەوتنی لەگەڵ ئاژانسە ژاپۆنییەکە واژوو کردووە بۆ نۆژەنكردنەوە و گۆڕینی تۆڕی ئاوی خواردنەوەی ژمارەیەك گەڕەكی كۆن و هەژارنشینی شاری هەولێر و دابینكردنی كەرەستەی یەدەگ بۆ پرۆژەی ئاوی ئیفراز سێی هەولێر.
پڕۆژە خزمەتگوزارییەکانی تۆڕی ئاو لە سلێمانی و هەڵەبجە بڕی شەش ملیۆن و 700 هەزار دۆلاریان تێدەچێت و ئاژانسە ژاپۆنییەکە وەک قەرزی درێژخایەن پڕۆژەکان جێبەجێدەکات.
