بەڕێوەبەری گشتیی بازرگانیی هەرێم ڕایدەگەیەنێت، لە سبەینێوە دەست بەدابەشكردنی پارەی گەنمی وەرگیراو لە جوتیاران دەكرێت و جەختیشدەكاتەوە پارەی ئەمساڵی گەنمی جوتیاران دواناكەوێت و لەكاتی خۆیدا دابەشدەكرێت.
نەوزاد شێخ كامیل بەڕێوەبەری گشتیی بازرگانیی هەرێم لەلێدوانێكدا بە تۆڕی میدیایی ئێستای ڕایگەیاند، ئەمڕۆ یەكشەممە كۆتایی بە وەرگرتنی گەنم لە جوتیاران هات و كۆی ئەو گەنمەی وەرگیراوە پارەكەی لە بەغدادەوە بۆ تەرخانكراوە كە 221 ملیار دینارە و تاوەكو ئێستا بەغداد 94 ملیار دیناری ناردووە.
ئاشكرایكرد، هەموو تۆنێك گەنم بە 850 هەزار دینار لە جوتیاران وەردەگيرێت و ئەگەر خاوێن نەبێت بە بڕە پارەیەك كەمتر وەردەگيرێت.
ئاماژەی بەوەشكرد، لەو بڕە پارەیەی نێردراوە بڕیارە لە سبەینێوە دەست بەدابەشكردنی بەسەر جوتیاراندا بكرێت.
