وەزارەتەكانی ناوخۆ و گەیاندنی هەرێم ڕایدەگەیەنن، كار لەسەر نەهێشتنی سیمكارتی بێخاوەنی (مۆبایل و ئینتەرنێت) دەكەن و بۆ ئەوەش پێویستە فرۆشیارانی مۆڵەت وەربگرن.
هەردوو وەزارەتی ناوخۆ و گواستنەوە و گەیاندنی هەرێمی كوردستان لە ڕاگەیەندراوێكی هاوبەشدا ڕایانگەیاند، بەمەبەستی ڕێكخستنی میكانیزمه‌كانی فرۆشتنی توێژاڵی ئه‌لیكترۆنی (سیمكارت) له‌لایه‌ن كۆمپانیاكانی بواری گه‌یاندن (مۆبایل و ئینته‌رنێت) له هه‌رێمی كوردستان ڕێنمایی ژماره (8ی ساڵی 2021) دەرچووێندراوە بۆ بنەبڕكردنی فرۆشتنی سیمكارت له بازاڕه‌كان به‌ده‌ر له میكانیزمه یاساییه‌كانی فرۆشتن و به خاوه‌نكردنیان به‌پێی بایۆمه‌تری ئه‌لیكترۆنی.
بەپێی ڕاگەیەندراوەكە، بڕیاردراوە لەمڕۆوە مۆڵەتی یەك مانگ دەدرێتە سه‌رجه‌م كۆمپانیاكانی پێشكه‌شكردنی خزمه‌تگوزاری په‌یوه‌ندی (مۆبایل و ئینته‌رنێت) به ئاگاداركردنه‌وه‌ی بریكاره‌كانی فرۆشتنی سیمكارت له بازاڕه‌كان به‌مه‌به‌ستی ده‌رهێنانی مۆڵه‌ت له وه‌زاره‌تی ناوخۆ و به ڕه‌زامه‌ندی ئاسایشی تایبه‌تمه‌ند.
هەروەها لە 24ی ئابی داهاتوو بەدواوە ده‌ستده‌كرێت به هه‌ڵمه‌تی داخستنی گشت ئه‌و شوێنانه‌ی سیمكارت ده‌فرۆشن و مۆڵه‌تییان نییه، له‌لایه‌ن لیژنه هاوبه‌شه‌كانی قائیمقامیه‌ته‌كان له پارێزگا و ئیداره سه‌ربه‌خۆكان، فرۆشتنی سیمكارت بێمۆڵه‌ت قه‌ده‌غه ده‌كرێت.
هەردوو وەزارەت داوا لە هاوڵاتییان و كۆمپانیاكانیش دەكەن هاوكار و پابه‌ندبن به جێبه‌جێكردنی ڕێنماییەكان به‌مه‌به‌ستی سه‌رخستنی پڕۆسه‌كه له‌پێناو به‌رژه‌وه‌ندی هاوڵاتییان و كه‌مكردنه‌وه‌ی ئه‌و گیروگرفتانه‌ی په‌یوه‌ندیان به (سیمكارت)ی بێخاوه‌نه‌وه هه‌یه.
