دژی هێرشەكەی ئەمڕۆی توركیا لە زاخۆ، خۆپیشاندان لە نەجەف دەستیپێكرد و لە بەغداد ئەگەری هێرشكردنەسەر باڵیۆزخانەی توركیا هەیە.
لە كاردانەوەی تۆپبارانەكەی ئەمڕۆی توركیا بۆ سەر زاخۆ، لە نەجەف خۆپیشاندان دەستیپێكرد و لە ژێر فشاری خۆپیشاندەراندا ناوەندی پێدانی ڤیزای توركیا داخرا و ئاڵای توركیا هێنرایە خوارەوە.
خۆپیشاندەرانی نەجەف ئاڵای توركیایان سووتاند و چەندین لافیتە و دروشمیان دژی توركیا بەرزكردووەتەوە و داوای بەرپەرچدانەوەی توركیا دەكەن.
بەشێك لە خۆپیشاندەرانی نەجەف بە هەردوو زمانی عەرەبی و توركی، هێرشەكەی توركیا بە تیرۆریستیی ناوزەد دەكەن و دەڵێن، “ئەردۆغان سنووری خۆت بزانە و سەربازەكانت بكشێنەرەوە”.
هاوكاتی خۆپیشاندانەكەی نەجەف، لە بەغداد ئەگەری هێرشكردنەسەر باڵیۆزخانەی توركیا هەیە و هێزێكی ئەمنیی زۆر لە بەردەم باڵیۆزخانەی توركیا بڵاوكراونەتەوە. چەندین دروشم و نووسرا و لافیتەش لە تۆڕە كۆمەڵایەتییەكاندا بڵاوكراونەتەوە و جەختدەكەنەوە كە سبەینێ خۆپیشاندان دژی توركیا دەستپێدەكەن.
