سەرۆكی لیژنەی دارایی لە پەرلەمانی كوردستان ڕوونكردنەوە لەبارەی دەستپێكردنەوەی پلە بەرزكردنەوەی فەرمانبەران دەدات و جەختیشدەكاتەوە لە ئێستادا نرخی نەوت بەرزبووەتەوە و دۆخی دارایی هەرێم باشە و لە لیژنەكەیان سەرقاڵی ئامادەكردنی ڕاپۆرتێكن لەو بارەیەوە.
زیاد جەبار، سەرۆكی لیژنەی دارایی لە پەرلەمانی كوردستان لە لێدوانێكدا بە تۆڕی میدیایی ئێستای ڕاگەیاند، پێشتر بەهۆی قەیرانی داراییەوە پلە بەرزكردنەوەی فەرمانبەران ڕاگیرابوو و ئێستاش دۆخی دارایی هەرێمی كوردستان باشە و نرخی نەوت لە بازارەكانی جیهان بەرزبووەتەوە.
ئاماژەی بەوەشكرد، لەڕووی یاساییەوە فەرمانبەران مافی خۆیانە پلە بەرزكردنەوەیان بۆ بكرێت پێشتر ئەو مووچەخۆرانە كە پلە بەرزكردنەوەیان بۆ نەكراوە لە مووچەكانیان زەرەرمەندبوون و بەتایبەت لە بابەتی خانەنشینیدا.
سەرۆكی لیژنەی دارایی ڕاشیگەیاند، پەرلەمانتاران چەند یاداشتێكیان پێشكەش بە دەستەی سەرۆكایەتیی پەرلەمانی كوردستان كردووە بۆ دەستپێكردنەوەی پلە بەرزكردنەوەی فەرمانبەران و ئاراستەی لیژنەكەمان كراوە و ئێمەش سەرقاڵی ئامادەكردنی ڕاپۆرتێكین لەو بارەیەوە كە وەزیری دارایی بانگێشتی پەرلەمان بكرێت و ڕوونكردنەوە لەو بارەیەوە بدات كە دەبێت پلە بەرزكردنەوەی فەرمانبەران دەستپێبكاتەوە و هیچ بیانوویەك بۆ ڕاگرتنی نەماوە.
