بەرپرسێكی وەزارەتی كشتوكاڵ و سەرچاوەكانی ئاوی هەرێم ڕوونكردنەوە لەبارەی پێدانی مۆڵەت بۆ هەڵكەندنی بیری ئیرتیوازی لە هەرێمی كوردستان دەدات، جەختیشدەكاتەوە تەنها مۆڵەت بەو شوێنانە دەدرێن كە زۆر پێویست بێت و ئاشكراشیدەكات ئەو شوێنانەی كە باخ و ڤێلایان تێدا دروستكراوە مۆڵەتیان پێنادرێت بیری ئیرتیوازی هەڵبكەنن.
ڕەحمان خانی بەڕێوەبەری گشتیی بەنداوەكانی هەرێمی كوردستان لە لێدوانێكدا بە تۆڕی میدیایی ئێستای ڕایگەیاند، لە ئێستادا وەزارەتی كشتوكاڵ و سەرچاوەكانی ئاوی هەرێم لە ڕێگای لیژنەیەكەوە سەرقاڵی دەركردنی ڕێنمایی نوێیە بۆ پێدانی مۆڵەتی تایبەت بە هەڵكەندنی بیری ئیرتیوازی كە مۆڵەت بە هەموو كەسێك نەدرێت و ئەگەر شوێنێك زۆر پێویست نەبێت ڕێگای پێنادرێت بیری ئیرتیوازی لێبدات.
ئاشكرایكرد، لە ڕابردوودا ئەوەندە بیری ئیرتیوازی لێدراوە كارەساتی دروستكردووە بۆیە لەڕێگای بەرێوەبەرایەتیی ئاوی ژێرزەوییەوە داوای مۆڵەت دەكرێت و دەبێت شوێنەكە زۆر پێویست بێت، چونكە ئاستی ئاوی ژێرزەوی لە هەرێمی كوردستان لە بارودۆخێكی زۆر خراپدایە پێشتر بە نایاسایی بیری ئیرتیوازی لێدراون.
ئاماژەی بەوەشكرد، ئەو ناوچانەی باخ و ڤێلایان تێدا دروستكراوە مۆڵەتی هەڵكەندنی بیری ئیرتیوازییان پێنادرێت، چونكە لە هەرێمی كوردستان ئاوی سەرزەوی زۆرە و سوودی لێوەناگرێت و بەپێچەوانەشەوە بارودۆخی ئاوی ژێرزەوی خراپە و هەوڵی لێدانی بیری ئیرتیوازیی زیانی زیاتر دەبێت.
