بۆ کۆچی دوایی عەلی قازی، کوڕی پێشەوا قازی محەمەد، بافڵ جەلال تاڵەبانی سەرۆكی یەكێتیی نیشتمانیی كوردستان پەیامێکی بڵاوکردەوە.
لە پەیامەكەیدا سەرۆكی یەكێتیی نیشتمانیی كوردستان دەڵێت، عەلی قازی یەکێک بوو لە کەسایەتییە نیشتمانپەروەرەکان و لە ڕووداوە سیاسییەکاندا هەڵوێستێکی نەتەوەییانە و کوردپەروەرانەی هەبوو، هەمیشە لەبەرەی گەل و لەخەمی خەڵکدا بووە.
دەقی پەیامەكە:
پرسە و ھاوخەمیی خۆمان بۆ کۆچی دوایی کەسایەتیی ناسراوی کورد عەلی قازی، کوڕی پێشەوا قازی محەمەد ڕادەگەیەنین.
عەلی قازی یەکێک بوو لە کەسایەتییە نیشتمانپەروەرەکان و لە ڕووداوە سیاسییەکاندا هەڵوێستێکی نەتەوەییانە و کوردپەروەرانەی هەبوو، هەمیشە لەبەرەی گەل و لەخەمی خەڵکدا بووە، ئەمە جگەلەوەی کوڕی پێشەوا قازی محەمەد، سەرۆکی کۆماری کوردستان بوو، کە مێژوویەکی پڕ لە شانازی و سەروەریی بۆ جێهێشتین وەک یەکێک لە پێشەواکانی گەلی کورد بۆ بەدەستهێنانی مافەکانمان.
بۆ ئەم خەمە، پرسە و هاوخەمیی خۆمان ئاراستەی کەسوکار و خانەوادەی سەربەرز و تێکۆشەری عەلی قازی دەکەین و خۆمان بە هاوبەشی پرسەکەتان دەزانین.
لە خوای گەورە داواکارین ڕۆحی کۆچکردوو شاد بکات و سەبووری بە هەموولایەک ببەخشێت.
