بەڕێوەبەری چاودێری و بازرگانیی سلێمانی ڕایدەگەیەنێت، نرخی یەك كیلۆ قەیسی بۆ جەژنی قوربان 11 هەزار دینارە و دەشڵێت نرخەكەی لە دەرەوە گرانە بۆیە دوكاندارەكان ناچارن بە گرانتر بیفرۆشن.
سۆران عەبدولغەفور، بەڕێوەبەری چاودێری بازرگانیی سلێمانی لە لێدوانێكدا بە تۆڕی میدیایی ئێستای ڕاگەیاند، نرخی یەك كیلۆ قەیسی 11 هەزار دینارە و پێشتریش یەك كیلۆ قەیسی هەر بە بەو نرخە بووە و گرانیی نرخەكەی پەیوەندی بە هاتنەوەی جەژنی قوربانەوە نییە، بەڵكو ماوەیەكە لەو نرخەدایە و هەرزان نەبووە.
ئاشكراشیكرد، یەك كارتۆن قەیسی كە 5 كیلۆی تێدایە دوكاندارەكان بە 50 هەزار دینار دەیكڕن و یەك كیلۆی 10هەزار دینار دەكەوێت و بۆیە ناچاردەبن كیلۆی بە 11 هەزار دینار بفرۆشنەوە.
ئاماژەی بەوەشكرد، ئەو قەیسییەی لە بازاڕدا هەیە زۆرینەی بەرهەمی توركیایە و بەرهەمی ناوخۆ كەمترە و ئەوەش هۆكارێكی دیكەیە كە نرخەكەیان گراندەكات.
