ئەمڕۆ چوارشەممە گەورەترین وەرزی بەجێگەیاندنی حەج لە دوای بڵاوبوونەوەی پەتای کۆرۆناوە دەستپێدەکات، تێیدا سەدان هەزار حاجی تەوافی گەیشتن ” طواف القدوم” بەدەوری کەعبەدا ئەنجامدەدەن.
حکومەتی سعودیە ئەمساڵ ڕێگەی دا یەک ملیۆن موسڵمان کە ڤاکسینی دژە کۆرۆنایان وەرگرتووە بەشداری وەرزی حەجی ئەمساڵ بکەن، لەو ژمارەیەش 850 هەزاریان لە دەرەوەی سعودیەوە هاتوون.
دوای بڵاوبوونەوەی کۆرۆنا لە جیهاندا سعودیە بڕیاری مەرجدارکردن و کەمکردنەوەی حاجیانیدا، ئەمساڵیش بە مەرجی وەرگرتنی ڤاکسینی کۆرۆنا و پشکنینی پێشوەختە ڕێگەی بە حاجیان داوە.
ژمارەیەکی زۆر لە حاجیان بەرلە دەستپێکردنی کاتی فەرمیی فەریزەی حەج، تەوافیان بەدەوری مەککەدا دەستپێکرد، ئەوەش بۆ خۆپاراستن و دوورکەوتنەوە لە قەرەباڵغی بەهۆی مەترسیی کۆرۆناوە.
بەشداربوونی حاجیانی ئەمساڵ لەڕێگەی تیروپشکەوە بوو، کە ژمارەیان زۆر زیاترە لە دوو ساڵی پێشوو بەڵام بەراورد بە کاتە ئاساییەکانی بەر لە بڵاوبوونەوەی کۆرۆنا کەمترە.
