وەزیری هەرێم بۆ کاروباری پێکهاتەکان و ئەندامی مەکتەبی سیاسی بەرەی تورکمانی عێراق ڕایگەیاند، داوایانكردووە ڕێگە نەدرێت لە دەنگدانی تایبەتدا دەنگ بە کورسی کۆتاکان بدرێت و تەنها لە دەنگدانی گشتیدا بتوانرێت دەنگ بە کۆتاکان بدرێت، ئەمەش بۆ ئەوەی پێکهاتەکان نوێنەری ڕاستەقینەی خۆیان بنێرنە پەرلەمان.
لە چاوپێکەوتنێکی تایبەتی تۆڕی میدیایی ئێستادا كە بژارد دەباغ پێشكەشی دەكات و بڕیارە ڕۆژی شەممە 4:00 پێشكەش بكرێت باسی دۆخی توركمانەكانی هەرێم و كورسی كۆتاكان لە هەڵبژاردنی پەرلەمانی كوردستان و چەند تەوەرێكی دیكە كرد.
ئەو ئاشكرایكرد، بە فەرمی داوایان لە سەرۆکایەتیی هەرێمی کوردستان کردووە کە لە هەڵبژاردنی ئایندەی پەرلەمانی کوردستاندا ڕێگە نەدرێت لە دەنگدانی تایبەتدا دەنگ بە کورسی کۆتاکان بدرێت و تەنها لە دەنگدانی گشتیدا بتوانرێت دەنگ بە کۆتاکان بدرێت، ئەمەش بۆ ئەوەی پێکهاتەکان نوێنەری ڕاستەقینەی خۆیان بنێرنە پەرلەمان.
سەبارەت بە کات و ادەی هەڵبژاردنەکانیش ئایدن مەعروف جەختی كردەوە، ئەستەمە لە وادەی دیاریکراودا هەڵبژاردنی پەرلەمانی كوردستان بکرێت، چونکە تا ئێستا کۆمسیۆن ڕێکنەخراوەتەوە و یاسای هەڵبژاردنیش هەموار نەکراوەتەوە بەڵام ئەوان وەکو پێکهاتەکان داوایان کردووە تەنها بە یەک بازنە هەڵبژاردن بکرێت.
لە بارەی دروستکردنی هێزیشەوە بۆ پێکهاتەکان وتی، “پێکهاتەکان لە كوردستان و عێراق لەژێر مەترسیدان، بۆیە دروستکردنی هێز و پڕ چەککردنیان کارێکی باشە و بەردەوامیشی دەبێت”.
