یاریدەدەرێتیی ئاسایشی حاجیاوا دەستگیرکردنی کەسێکی ڕاگەیاند، کە تۆمەتباربووە بە دزیکردن لە ماڵان و چەندین شوێنی کاری هاوڵاتییانی بڕیوە.
لە ڕاگەیەندراوێکدا بەڕێوەبەرایەتیی ئاسایشی ڕاپەڕین بڵاویکردەوە، تۆمەتبارێک کە لە یاسا هەڵاتووە و داواکراوبووە، لە چیای ماکۆک دوای تەقەکردن و ڕووبەڕووبوونەوە لەگەڵ هێزەکانی ئاسایش توانراوە دەستگیربکرێت.
ئاسایشی ڕاپەڕین ئاماژەی بەوەکردووە، ئەو کەسە دزی لە ماڵان کردووە و چەندین شوێنی کاری خەڵکی بڕیوە، ئاسایش بە “کەسێکی مەترسیدار” ناوی دەبات.
تۆمەتبارەکە ناوی (س. ی. ع)ـە و لەدایکبووی 1994ـە، دانیشتووی قەزای کۆیەیە، پێشتر فەرمانی دەستگیرکردنی هەبووە و هەڵاتووە.
لەکاتی دەستگیرکردنی تۆمەتبارەکەدا ئاسایشی حاجیاوا، ئۆتۆمبێلێکی بێسەرەتا، چەکێکی کڵاشینکۆف و مەخزەنێکی پڕ لە فیشەک و دوو مۆبایل و چەندین کەرەستەی دیکە دەستیبەسەردا گیراوە.
