دەستەی پیشەسازیی جەنگیی عێراق دەڵێت، دووربینی شەو دروستدەكەن و بەرهەمەكانیان خزمەتی دوو وەزارەت دەكەن.
ئەمڕۆ پێنجشەممە دەستەی پیشەسازیی جەنگیی عێراق ڕایگەیاند، بەرهەمەكانیان تەنها سەربازی نین و خزمەت بە كەرتی شارستانی دەكەن.
محەمەد سابت بەڕێوەبەری كارگەی كۆمپانیای گشتیی پیشەسازیی مس و میكانیك لە دەستەی پیشەسازیی جەنگی ڕایگەیاند، لە بەشی بەرهەمە شارستانییەكاندا وایەر و شیش و بوتڵی غاز و بەرمیلی ئاسن و بۆری و چەندین جۆر كەرەستەی تر دروستدەكەن، ئەو كەرەستانە سوود بە هەردوو وەزارەتی كارەبا و پیشەسازی و كەرتی تایبەتیش دەگەیەنن.
بەپێی وتەی بەڕێوەبەری كارگەكە، پلانیان داڕشتووە بۆ پەرەپێدانی بەشی بەرهەم و كەرەستەی سەربازی و جگە لە فڕۆكەی بێفڕۆكەوان و دەمانچە، دووربینی شەو دروستدەكەن.
لە ماوەی ڕابردوودا دەستەی پیشەسازیی جەنگی ڕایگەیاندبوو، بۆمبی فڕۆكە و دەمانچە و فڕۆكەی بێفڕۆكەوان دروستدەكات.
