قائیمقامیەتی سلێمانی لە پێناو پاراستنی تەندروستیی گشتی و بەرگرتن لە حاڵەتەكانی سكچوون و ڕشانەوە لەبارەی بەكارهێنانی سەوزە و دۆ و پیاڵەی شووشەوە سەرجەم خواردنگە، چایخانە و ڕیستورانتەكانی سلێمانی ئاگاداردەكاتەوە.
ڕێكان جەمال، سەرۆكی لیژنە هاوبەشەكانی قائیمقامیەتی سلێمانی ڕایگەیاند، “بەڕێوەبەرایەتیی خۆپاراستنی تەندروستی داوای لێكردووين بەهۆی زۆربوونی حاڵەتەكانی سكچوون و ڕشانەوەوە ڕێكاری پێویست بگيرنەبەر و لە قۆناغی یەكەمدا بەشی زۆری ئەو شەمعە و بیرانەمان داخست كە ئاوەكانیان بۆخواردنەوە شیاو نەبوون”.
ئاشكرایكرد، ” لێرەوە هەموو چێشتخانەو خواردنگە و چایخانانە ئاگاداردەكەینەوە بە هیچ جۆرێك نابێت سەوزە بە هەموو جۆرەكانییەوە و دۆی كراوە(دروستكراو) و پیاڵەی شووشە بۆ چا بەكاربهێنن، لە سبەینێوە هەر شوێنێك پابەندی ئەو ڕێنماییانە نەبێت ڕێكاری توندی بەرامبەر دەگیرێتەبەر”.
داواش لە هاوڵاتییان دەكات لەكاتی بوونی هەر گومانێك یاخود بۆ گەیاندنی سكاڵا و زانیاری بە قائیمقامیەتی سلێمانی و لیژنە هاوبەشەكان، پەیوەندی بە ژمارە مۆبایلی (07708677777)ـەوە یان لاپەڕەی فەرمیی قائیمقامیەت لە تۆڕی كۆمەڵایەتیی فەیسبووكەوە بكەن.
