بەرپرسانی تەندروستی لە سلێمانی كۆبوونەوەیەكیان ئەنجامدا و تیایدا ئامادەكارییەكان بۆ ڕێگریكردن لە بڵاووبوونەوەی سكچوون و ڕشانەوە تاوتوێكرا.
سەباح نەسرەدین ئەحمەد، بەڕێوەبەری گشتیی تەندروستی سلێمانی ئەمڕۆ سەرپەرشتی کۆبوونەوەیەکی کرد کە تایبەت بوو بە ڕێگریکردن و ئامادەکاری لە تەشەنە نەکردن و بڵاونەبوونەوەی حاڵەتەکانی سکچوون و ڕشانەوە لە نەخۆشخانەکانی سەنتەری شاری سلێمانیدا.
کۆبوونەوەکە، كە بە ئامادەبوونی نوێنەری ڕێکخراوی تەندروستی جیهانی who و بەڕێوبەرانی نەخۆشخانەی شار و نەخۆشخانەی د. جەمال ئەحمەد ڕەشیدی منداڵان و ژمارەیەك بەڕێوەبەر و بەرپرسی دیكە بەڕێوەچوو، تیایدا گفتوگۆکرا لەبارەی حاڵەتەکانی سکچوون و ڕشانەوە لە نێو منداڵان و پشکنینەکان و داخڵبوونیان لە نەخۆشخانەکان کە چۆن چارەسەرە تەندروستییەکانیان پێشکەشبکرێت و بەری پێ بگیرێت لە گواستنەوە بە ڕەچاوکردنی خۆپارێزییەکان و جێبەجێکردنی ڕێنماییە پزیشکییەکان لەو حاڵەتانەی هۆکارن بۆ تووشبوون و بڵاوکردنەوەی.
