سۆران عومەر ئەندامی ئەنجومەنی نوێنەرانی عێراق باسی لەوەکرد، هەڕەشەیەکی مەترسیدار بۆ سەر ژینگە و تەندروستیی هەرێمی کوردستان لەئارادایە، ئەوەی مەترسیدارترە ئەوەیە ئێستا کاتژمێر 12:00ی شەو ڕێکدەکەون بۆئەوەی نرخی بەنزین 50 دینار بەرزبکەنەوە، چونکە دەڵێن خەڵک نوستووە.
سۆران عومەر ئەندامی ئەنجومەنی نوێنەرانی عێراق لە کۆنگرەیەکی ڕۆژنامەوانیدا ڕایگەیاند، ئەمەی ڕوودەدات کارەساتێکی گەورەیە و بێ حکومەتییە، چەند کەسێک شەوان ڕێکدەکەون نرخی بەنزین بەرزبکەنەوە، لەکاتێکدا بەشێک لەو بەنزینەی هەیە هەڵیدەگرن و دەڵێن، “بەنزین نییە ئەگەر گرانی نەکەین قەیرانی گەورەتر ڕوودەدات”.
سۆران عومەر وتی، “چەند کەسێک لە هەرێمی کوردستان نرخی بەنزین بەرزدەکەنەوە و یاری بە قوت و تەندروستیی خەڵک دەکەن”.
باسی لە نرخی بەنزین لە عێراق کرد و ڕایگەیاند، حکومەتی عێراق بە یەک دۆلار و نیو لیترێک بەنزین دەکڕێت بە 650 هەزار دەیداتەوە بەخەڵک، ئەوەی ناوخۆش دەپاڵێوێت و بە 450 هەزار دەیدات بە خەڵک، لە عێراق ڕێگەنادرێت بەبیانووی گرانبوونی نرخی نەوت یەک دینار بۆ نرخی بەنزین و گاز زیادبکرێت.
باسی لەوەشکرد، حکومەتی هەرێم بەنزینی داوەتە دەست کۆمەڵێک “چاوچنۆک” کە ژەهر دەهێنن و قازانجی خەیاڵیشی لێدەکەن.
بەپێی وتەی سۆران عومەر، ئەو بەنزینە 690 دیناریەی کە نەماوە، ئێستا بە ڕێککەوتن شەوانە داخڵی هەرێمی کوردستان دەکرێت و بە هەزار و 200 دینار دەدرێت بە خەڵک.
سەبارەت بە چارەسەری گرانی بەنزین و گاز سۆران عومەر ڕایگەیاند، حکومەت ئەگەر ناتوانێت بۆ هەموو خەڵکی هەرزانی بکات با پاڵپشتی پاس و تەکسییەکان بکات و نرخەکەی بۆ هێڵە گشتییەکان کەمبکاتەوە.
