زیاتر لە 800 چەكداری داعش و بۆكۆحەرام لە ئەفریقا كوژراون و بەشێك لە وڵاتانی كیشوەرەكە دەڵێن، دوای كشانەوەی فەرەنسا بەرەنگاربوونەوەی تیرۆر لە ئەفریقا باشتربووە.
فەرماندەیی هێزە هاوبەشەكانی ئەفریقا ڕایگەیاند، سوپاكانی نایجیریا، نەیجەر، چاد و كامیرۆن زیاتر لە 800 چەكداری داعش و بۆكۆحەرام-یان لە ناوچەی دەریاچەی چاد كوشتووە.
بەپێی ڕاگەیەندراوی هێزە هاوبەشەكان، ئەو چەكدارانە لە ماوەی دوو مانگدا كوژراون و سێ هەزار سەرباز بەشداریی شەڕەكانیان كردووە.
بەپێی وتەی شارەزایانی ئاسایش و سەربازی، دوای كشانەوەی هێزەكانی فەرەنسا لە ئەفریقا، داعش و بۆكۆحەرام بۆشاییەكەیان قۆستووەتەوە و سێگۆشەی سنووریی نێوان نەیجەر و مالی و بۆركینا فاسۆ بەكاردەهێنن بۆ بەهێزكردنی پێگەی خۆیان.
بە پێچەوانەی ئەو بۆچوونەوە، هێزە هاوبەشەكانی چوار وڵاتە ئەفریقییەكە جەختدەكەنەوە كە دوای كشانەوەی فەرەنسا، بەرەنگاربوونەوەی داعش و بۆكۆحەرام چووەتە قۆناغێكی پێشتر و باشترەوە و شەڕی تیرۆر لە ساحلل عاج و بیابانی ئەفریقا لە بەرژەوەندیی هێزەكانی ئەواندایە.
