ئەندامێكی مەكتەبی سیاسیی یەكێتی نیشتیمانیی كوردستان ئامانجی سەردانەكەی سەرۆكی یەكێتی بۆ بەغداد ئاشكرادەكات.
ئەمین بابەشێخ، ئەندامی مەكتەبی سیاسیی یەكێتی لە تویتێكدا كە لە هەژماری تایبەتیی خۆی لە تۆڕی كۆمەڵایەتی تویتەر بڵاویكردووەتەوە نووسیویەتی، “ئامانجی سەردانەكەی سەرۆكی یەكێتیی نیشتمانیی كوردستان بۆ بەغداد، بەمەبەستی گفتوگۆكردنە لەسەر دۆخی سیاسی لەگەڵ لایەنە سیاسییەكان و پێكهێنانی حكومەت”.
دەشڵێت، لە كۆبوونەوەكاندا سەرۆكی یەكێتی جەختی لە گرنگی و پێویستی پەیوەندیی نێوان لایەنەكان كردەوە بۆ كۆتاییهێنان بەم دۆخە چەقبەستووە سیاسییەی كە ئێستا لە پرۆسەی سیاسی دروستبووە.
هەر لە تویتەكەی ئەو ئەندامەی مەكتەبی سیاسیی یەكێتی هاتووە، یەكێكی دیكە لە ئامانجەكانی كۆبوونەوەكانی بافڵ جەلال تاڵەبانی ئەوەیە، كە پەلەبكرێت لە پێكهێنانی حكومەتێكی خزمەتگوزار بۆ هاوڵاتییان كە توانای چارەسەركردنی كێشەكانی هەبێت لە عێراقدا.
