بافل جەلال تاڵەبانی سەرۆکی یەکێتیی نیشتمانیی کوردستان بۆ کۆچی دوایی دکتۆر عەزیز گەردی دەڵێت، ژیان و ئەزموونی ئەو نووسەر و وەرگێڕە وانەیە بۆ ئەوانەی دەیانەوێت خزمەت بکەن، مێژوو بە شانازییەوە ناوی دەهێنێت.
بافڵ جەلال تاڵەبانی دڵتەنگی و نیگەرانیی خۆی بۆ کۆچی دوایی دکتۆر عەزیز گەردی نیشانداوە و ڕایگەیاندووە، ” کۆچی دوایی مامۆستا عەزیز گەردی، نووسەر، ئەکادیمیست و وەرگێڕە ناسراوەکەی کوردستان خەسارەتێکی گەورەیە و لە دڵەوە نیگەرانی کردین”.
سەرۆکی یەکێتیی نیشتمانیی کوردستان دەڵێت، ژیان و ئەزموونی مامۆستا عەزیز گەردی وانەیەکی گرنگ و کاریگەرە بۆ هەموو ئەوانەی دەیانەوێت خزمەت بکەن و ناویان لە مێژوودا بە درەوشاوەیی بمێنێتەوە.
ستایشی کارەکانی دکتۆر عەزیز گەردی دەکات ڕایگەیاندووە، “ئەو یەکێک بوو لەو نووسەرە دەگمەنانەی بێئەوەی چاوەڕوانی هیچ ستایش و پیاهەڵدانێک بێت، لە خەمی زمان و فەرهەنگی نەتەوەکەیدا بوو، بە ئاوڕدانەوەیەک بۆ کتێبخانەی کوردی لەو ڕاستییە تێدەگەین، هیچ کەسێک بە ئەندازەی عەزیز گەردی قەڵەمەکەی پڕکار و بەبڕشت نەبووە”.
