بەڕێوەبەرایەتیی گشتیی تەندروستیی دهۆک لەبارەی تەندروستیی ئەو گەنجەی شەوی ڕابردوو گوێی بڕدرا ئاشکرایکرد، هێشتا چارەسەر وەردەگرێت بەڵام تەندروستیی جێگیرە.
سەبارەت بە ئەگەری لەدەستدانی هەستی بیستنی قوربانییەکە لەلێدوانێکدا بۆ تۆڕی میدیایی ئێستا دکتۆر هەمزە ڕەزکی وتەبێژی بەڕێوەبەرایەتیی گشتیی تەندروستیی دهۆک ڕایگەیاند، ئێستا بیستنی کێشەی نییە و هەرچییەکی پێدەوترێت دەبیستێت، بەڵام نازانین لە داهاتوودا زیانی بەردەکەوێت یان نا، بۆ ئەوەش پێویستە پزیشکانی قوربانییەکە دوای دیراسەکردنی بڕیاری لەسەر بدەن.
شەوی ڕابردوو گەنجێک بەناوی وەجدی زێدان لە کامپی شاریای پارێزگای دهۆک، لەکاتی گەڕانەوەیدا بۆ ماڵەوە لەلایەن سێ کەسەوە هێرش دەکرێتە سەری و هەردوو گوێی دەبڕن.
