تەندروستیی سلێمانی دەڵێت، شەپۆلێكی سكچوون و ڕشانەوە لەناو منداڵاندا بڵاوبووەتەوە و لە 48 كاتژمێردا 163 منداڵ داغلكراون كە زیاتر لە 100یان بەهۆی سكچوونەوە بووە.
بەڕێوەبەرایەتیی گشتیی تەندروستیی سلێمانی ڕایگەیاند، لەئێستادا شەپۆلێکی سکچوون و ڕشانەوە لەناو منداڵاندا بڵاوبووەتەوە.
هەروەك لە زاری دكتۆر پشدەر عەبدوڵا، پزیشکی پسپۆڕی نەخۆشیەکانی منداڵان و گەشەی منداڵ و بەڕێوەبەری نەخۆشخانەی د. جەمال ئەحمەد ڕەشیدی منداڵان ڕایگەیاند، بەهۆی ئەو شەپۆلەوە لە 48 كاتژمێری ڕابردوودا 163 منداڵ لە نەخۆشخانە خەوێندراون، لەو ژمارەیە 102 منداڵیان بەهۆی سكچوون و ڕشانەوە بووە.
تەندروستیی سلێمانی بۆ ڕێگەگرتن لە تووشبوون بە سکچوون و ڕشانەوە چەند ڕێنماییەكی بڵاوكردووەتەوە، لەوانە:
١-هەموو ئاوێک بکوڵێنە دواتر ساردی بکەرەوە و بۆ خواردنەوە بەکاریبهێنە.
٢- خواردن لەناو سەلاجە هەڵبگرە.
٣- سەوزە و میوە پێش خواردنی جوان بشۆرەوە.
٤-زوو زوو دەستی منداڵەکەت بشۆ بەتایبەت دوای تەوالێت کردن.
٥- پاکوخاوێنی تەوالێت و حەمام زۆر گرنگە.
٦- بەکارنەهێنانی خاولی و پەرداخ و کەوچکی یەکتر.
٧- دوورکەوتنەوە لە خواردنی دەرەوە بەتایبەت ئەوانەی سەر عەرەبانەکان.
٨- باش کوڵاندنی گۆشت و خواردنەکان.
