ناوەڕۆكی كۆبوونەوەكەی ئەمڕۆی سەركردە و نوێنەری حزبەكان و پلاسخارت ئاشكراكرا

گەڕاندنەوەی مووچە پاشەكەوتكراوەكان و باشكردنی دۆخی ئابوریی هاوڵاتییان و ئەنجامدانی هەڵبژاردنی پەرلەمانی كوردستان و هەمواركردنەوەی یاسای هەڵبژاردن، ناوەڕۆكی كۆبوونەوەكەی ئەمڕۆی سەركردە و نوێنەرانی حزب و لایەنەكانی هەرێمی كوردستان لەگەڵ نێردەی تایبەتیی نەتەوە یەكگرتووەكان لە عێراق بوون، وەك بەشداربوویەكی كۆبوونەوەكە ئاشكرایكرد.

ئەمڕۆ پێنجشەممە لە شاری هەولێر سەركردە و نوێنەری حزب و لایەنە سیاسییەكانی هەرێمی كوردستان لەگەڵ جێنین پلاسخارت نێردەی تایبەتیی نەتەوە یەكگرتووەكاندا كۆبوونەوە، یەكێك لە بەشداربووانی كۆبوونەوەكە ناوەڕۆكی گفتوگۆكانی ئاشكراكرد و وتی، بارودۆخی هەرێمی كوردستان و هەڵبژاردنی پەرلەمانی كوردستان گفتوگۆیان لەبارەوە كراوە.

سەڵاحەدین بابەكر كارگێڕی ئەنجومەنی جێبەجێكردنی یەكگرتووی ئیسلامیی كوردستان ڕایگەیاند، “لە كۆبوونەوەكەدا زۆر ڕاشكاوانە دەستخرایەسەر كێشە و قەیرانەكان و ئەو گرفت و بنبەستە سیاسییەی ئێستا هەیە، بە پێویست زانرا كێشەی مووچە چارەسەربكرێت و بەشێك لە مووچە پاشەكەوتكراوەكان بگەڕێندرێنەوە”.

وتیشی، ناوەڕۆكی گفتوگۆكان ئەوە بوو كە “لایەنەكان پێكەوە گفتوگۆبكەن و هەڵبژاردنێكی پاك و ئازاد ئەنجامبدرێت و یاسای هەڵبژاردن هەمواربكرێتەوە”.

بەپێی وتەی سەڵاحەدین بابەكر، نەتەوە یەكگرتووەكان و جێنین پلاسخارت-ی نێردەی تایبەتیی ڕێكخراوەكە لە عێراق، “دەیانەوێت نزیككردنەوە لە بۆچوونی لایەنەكاندا بێتە ئاراوە و هەموو كێشەكان چارەسەربكرێن و كۆتایی بە بنبەستی سیاسی بهێنرێت”.

كارگێڕی ئەنجومەنی جێبەجێكردنی یەكگرتووی ئیسلامیی كوردستان كە وەك نوێنەری حزبەكەی بەشداریی كۆبوونەوەكەی ئەمڕۆی كردووە، لەبارەی هەنگاوی داهاتووی سەركردەی حزب و لایەنەكانەوە ئاشكرایكرد، بڕیاردرا كۆبوونەوەیەكی تر ڕێكبخرێت و خاڵەكانی كۆبوونەوەكەی ئەمڕۆی تیادا تاوتوێبكرێن و بڕیاریان لەبارەوە بدرێت.

بابەتی پێشتر

تەندروستیی جیهانی: سورێژەی مەیموون نەبووەتە پەتایەكی جیهانی

بابەتی دواتر

تۆم كروز: لە ژیانمدا ڕۆژێك پشووم وەرنەگرتووە

بابەتی پەیوەندیدار
زیاتر ببینە

كەشناسیی هەرێم هۆشداری دەدات

بەڕێوەبەرایەتیی گشتیی كەشناسی و بومەلەرزەزانیی هەرێم بەهۆی ناسەقامگیری كەشوهەواوە هۆشداری دەدات و داوایەكیش ئاراستەی هاوڵاتییان دەكات. بەپێی راگەیەندراوێكی…
زیاتر ببینە

چەمچەماڵ.. ماتۆڕسوارێك گیانیلەدەستدا

بەڕێوەبەرایەتیی تەندروستیی چەمچەماڵ بڵاویكردەوە، پیاوێكی تەمەن 49 ساڵ بەهۆی ڕووداوی ماتۆڕسكیل گیانیلەدەستدا. تەندروستیی چەمچەماڵ، لە ڕاگەیەندراوێكدا ئاماژەی بەوەكردووە،…
Total
0
Share