کرێى خوێندن لە زانكۆ و پەیمانگا تایبەتەکانی هەرێم كەمكرایەوە

تابلۆی وەزارەتی خوێندنی باڵا و توێژینەوەی زانستیی هەرێم

خوێندنی باڵای هەرێم ئاشكرایكرد، بە لەبەرچاوگرتنى بارودۆخى دارایى هاوڵاتییانى هەرێمى کوردستان، کرێى خوێندن لە زانکۆ و پەیمانگا تایبەتەکان بەپێى ئەنجامەکانى ڕیزبەندیى نیشتمانیی زانکۆکانى کوردستان بۆ ساڵى (2019)، بە ڕێژەى (10 بۆ 20%) بۆ سەرجەم قۆناغەکانى خوێندن کەمکرایەوە.

لە ڕاگەیەندراوێكدا وەزارەتی خوێندنی باڵا و توێژینەوەی زانستی ئەمڕۆ یەكشەممە 22ی تشرینی دووەم ڕایگەیاندووە، “ئەمڕۆ بە سەرپەرشتىی د.ئارام محەمەد قادر، سەرۆکى ئەنجومەنى وەزارەت و وەزیری خوێندنی باڵا و توێژینەوەی زانستی و ئامادەبوونى بریکارى وەزارەت و سەرۆکی زانکۆکان و ئەندامانی ئەنجومەنی وەزارەت، کۆبوونەوەى تەواوکارى ژمارە (10)ى ئەنجومەنى وەزارەتى خوێندنى باڵا و توێژینەوەى زانستى بەشێوەى ئۆنلاین بەڕێوەچوو”.

بەگوێرەی ڕاگەیەندراوەكە، وەزیری خوێندنی باڵا پرسە و سەرەخۆشى ئاڕاستەى سەرجەم خانەوادەی ئەو مامۆستا و فەرمانبەر و خوێندکارانە کردووە كە لەم ماوەیەدا بە هۆى پەتاى کۆرۆناوە گیانیان لەدەستداوە.

سەبارەت بە کەمکردنەوەى کرێى خوێندن لە زانکۆ و پەیمانگە تایبەتەکان، ئارام محەمەد، وەزیرى خوێندنى باڵا و توێژینەوەى زانستى ڕایگەیاندووە، “هەرێمى کوردستان بە بارودۆخێکى تایبەت گوزەر دەکات بەشێوەیەک پێویستە هەمووان ڕەچاوى بار و گوزەرانى دارایى خەڵکى خۆمان بکەین و لەهەمان کاتیشدا بتوانین هەلى خوێندن بۆ هەمووان دەستەبەر بکەین، لەو چوارچێوەیەشدا بۆ ئەوەى ڕوحیەتى کێبڕکێى زانستى لە دامەزراوە ئەکادیمییەکان بپارێزین و بە لەبەرچاوگرتنى بارودۆخى هاوڵاتییان بڕیارماندا بە کەمکردنەوەى کرێى خوێندن لە زانکۆ و پەیمانگە تایبەتەکان”.

وەزری خوێندنی باڵا ئەوەشی ئاشكراكردووە، كەمكردنەوەی كرێی خوێندن بەپێى ئەنجامەکانى ڕیزبەندى نیشتمانیی زانکۆکانى کوردستان بۆ ساڵى (2019) دەبێت كە لەلایەن وەزارەتى خوێندنى باڵا و توێژینەوەى زانستییەوە ڕاگەیەندراوە بەمشێوەى خوارەوە:

ئەو زانکۆیانەى دەکەونە گروپى B، بە ڕێژەى (10%) کرێى خوێندن کەمدەکرێتەوە.

ئەو زانکۆیانەى دەکەونە گروپى C، بە ڕێژەى (15%) کرێى خوێندن کەمدەکرێتەوە.

ئەو زانکۆیانەى دەکەونە گروپى D، بە ڕێژەى (20%) کرێى خوێندن کەمدەکرێتەوە.

سەرجەم پەیمانگە تایبەتەکان و کۆلێژە زانکۆییەکان بە ڕێژەى (20%) کرێى خوێندنیان کەمدەکرێتەوە.

بابەتی پێشتر

ئاماری نوێی كۆرۆنا لە هەرێم ڕاگەیەنرا

بابەتی دواتر

ژمارەیەك كەسایەتیی ئێزدی لە ڕوونكردنەوەیەكدا هێرش دەكەنە سەر پارتی

بابەتی پەیوەندیدار
Total
1
Share