ئەمڕۆ لە تەلاری هونەر-ی شاری سلێمانی 25ـەمین خولی فێستیڤاڵی نێودەوڵەتیی گەلاوێژ دەستیپێکرد.
بەهۆی 25 ساڵ بەردەوامبوونییەوە، ئەمساڵ فێستیڤاڵەکە پێیناوەتە قۆناغی “یوبیلی زیوین”ـەوە.
ئەمڕۆ و لە ڕۆژانی دواتریشدا، بڕیارە فێستیڤاڵەکە چەندین کۆڕ و چالاکیی هونەری و ئەدەبی لەخۆبگرێت، بە میوانداریی چەندان نووسەر و هونەرمەندی کورد و بیانی.
گەلاوێژ فێستیڤاڵێکی ئەدەبی و هونەرییە، ساڵانە دەزگای گەلاوێژ ڕێکیدەخات و بە چەندین چالاکیی فەرهەنگی دەستپێدەکات و بە دابەشکردنی خەڵاتەکانی پێشبڕکێی نووسینی ئەدەبی تەواودەبێت، کە دەستەی فێستیڤاڵ بەسەر هەریەک لە براوەکانی بواری چیرۆک، شیعر و لێکۆڵینەوەدا دابەشیان دەکات.
