سەرۆكی دادگای تێهەڵچوونەوەی ناوچەی هەولێر ڕایدەگەیەنێت، لابردنی لە پۆستەكەی نایاساییە و دەڵێت، “هاتنی هێزی پۆلیس و ئەمنی بۆ نێو دادگاكە هیچ بنەمایەكی نییە و دوورە لە ڕاستییەوە.
بەپێی ڕاگەیەندراوێكی ئیبراهیم ئیسماعیل، سەرۆكی دادگای تێهەڵچوونەوەی ناوچەی هەولێر تێیدا هاتووە، ئەمڕۆ یەكشەممە لە تۆڕە كۆمەڵایەتییەكان باس لە گۆڕانكاریی سەرۆكی دادگای تێهەڵچوونەوەی ناوچەی هەولێر كراوە و ئێمە دادوەرین و لە دادگا كاردەكەین پێویستە ڕێكارە كارگێڕییەكان یاسایی بن، بەپێچەوانەوە بڕیاری گۆڕانكارییەكەی سەرۆكایەتيی دادگای تێهەڵچوونەوەی ناوچەی هەولێر كە لەلایەن سەرۆكی ئەنجومەنی دادوەری ئەنجامدراوە نایاساییە دەبێتە هۆی دروستكردنی خاڵێكی ڕەش لەسەر سەروەری یاسا و پڕۆسەی دادوەریی،
ئاماژەی بەوە كرد، ” بە مافی یاسایی خۆمم دەزانم تانە لەم بڕیارە بدەم لە چەند دەزگایەكی یاسایی پەیوەندیدار بە بابەتەكە و سەرۆكی ئەنجومەنی دادوەریی پێیڕاگەیاندووم چۆن كراوە و ئەوەش لە نزیكترین كاتدا بۆ ڕای گشتی ڕووندەكەمەوە”.
سەرۆكی دادگای تێهەڵچوونەوەی ناوچەی هەولێر دەڵێت، “من ئامادەم بۆ هەر گۆڕانكارییەك كە بەڕێگای دروست و یاسایی ئەنجامبدرێت”.
باسی لەوە كرد، بابەتی هاتنی هێزێكی پۆلیس و ئەمنی بۆ نێو دادگاكە بە مەبەستی ڕێگریكردن لە گۆڕانكارییەكە هیچ بنەمایەكی نییە و دوورە لە ڕاستییەوە، بەڵكو ڕاستیەكە ئەوەیە كە ئەمڕۆ یەكشەممە شاندێكی بیانی سەردانی دادگاكەیان كردووە ماوەیەك ماونەتەوە و چەند دیدار و گفتوگۆیەكمان ئەنجامداوە و ئەم هێزە بۆ پاراستنی شاندەكە لەوێ بوون.
