لە کۆتاییدا کۆریای باکوور بڵاوبوونەوەی ڤایرۆسی کۆرۆنای لە وڵاتەکەیدا ڕاگەیاند و لە نەبوونی ژێرخانێکی پتەوی تەندروستیدا، دەوڵەت بە “دەرمانی سروشتی” ڕووبەڕووی ڤایرۆسەکە دەبێتەوە.
لە کاتێکدا جیهان کاریگەرییە وێرانکەرەکانی کۆرۆنا بۆ سەر سێکتەرەکانی ئابوری و تەندروستی تێدەپەڕێنێت و پاش دوو ساڵ بەسەر بڵاوبوونەوەی ڤایرۆسەکەدا، کۆریای باکوور بۆ یەکەمجار بە فەرمی دانیپێدادەنێت خەریکی ڕووبەڕووبوونەوەیەتی و هانای بۆ “ڕێوشوێنی کەلەپووری و سروشتی” بردووە، بەهۆی نەبوونی پێداویستییە تەندروستییەکانەوە.
وڵاتەکە ئامارێکی ڕوونی بۆ ژمارەی مردوو و تووشبوو نییە و چاودێران هۆکارەکەی بۆ ئەوە دەگێڕنەوە، کۆریای باکوور تەنانەت توانای ئەنجامدانی پشکنینی سەرەتاییشی نییە.
بە هۆی کۆرۆناوە، مەترسیی قەیرانی خۆراک و تەندروستییش هەیە، بەهۆی لاوازیی ژێرخانی تەندروستی و ئابوورییەوە لەو دەوڵەتە 25 ملیۆن کەسییەدا.
“ڕۆدۆنگ سینەمۆن” ڕۆژنامەی سەرەکیی وڵاتەکە ڕێنمایی بەو کەسانە داوە کە تەنگنەفەسی و کۆکە و خوێنهەڵهێنانەوەیان هەیە و ڕەنگە کۆرۆنایان بێت، 5 گرام گەڵای “بی” بخەنە ئاوی گەرمەوە و ڕۆژیی 3 جار بیخۆنەوە.
هەروەها لە تەلەفیزیۆنە فەرمییەکانی دەوڵەتدا وێنەی جووڵاوی چەند کەسایەتییەکی فلیمکارتۆنی پەخشدەکرێت، کە داوا لە بینەران دەکەن سەردانی پزیشک بکەن، ئەگەر هەستیان بە نیشانەی نائاساییکرد لە خۆیاندا.
