پەرلەمانی كوردستان بە توندی وەڵامی ڕاپۆرتەكەی ئینستیتیوتی پەی دەداتەوە و ڕایدەگەیەنێت، “هەر زانیاری و بابەتێك پەیوەست بێت بەپەرلەمان لە ماڵپەڕی پەرلەمان بڵاونەكرابێتەوە ڕاستنین و ئامانج لێیان چەواشەكاری و بەلاڕێدابردنی كارەكانی دامەزراوەی پەرلەمانە”.
بەپێی ڕاگەیەندراوێك كە لەبەڕێوەبەرایەتیی ڕاگەیاندنی پەرلەمانی كوردستانەوە بڵاوكراوەتەوە تێیدا هاتووە، “وێڕای چەندینجار ڕوونكردنەوەی پێویست لە دانیشتنەكانی پەرلەمان، دووپاتیدەكەینەوە هەر زانیاری و بابەتێك پەیوەست بە ڕۆڵی دەستەی سەرۆكایەتی و ئەندامانی پەرلەمان و كاری لیژنەكان و بەڕێوەچوونی دانیشتنەكانی پەرلەمان بە فەرمی لە ماڵپەری پەرلەمانی كوردستان بڵاونەكرابنەوە، ڕاستنین و ئامانج لێیان چەواشەكاری و بەلاڕێدابردنی كاری دامەزراوەی پەرلەمانە”.
دوێنێ ئینستیتیوتی پەی ڕاپۆرتێكی لەبارەی كاروچالاكییەكانی پەرلەمانی كوردستان بڵاوكردەوە و ئاشكرایكردبوو، پەرلەمانتار هەیە لە یەك ساڵدا یەك خولەك قسەی كردووە و زۆرینەی پەرلەمانتارانیش ئیمەیلیان نییە.
