بەپێی بەڵگەنامەیەك پێنج پەرلەمانتاری بزوتنەوەی ئیمتیداد كە هاوپەیمانی نەوەی نوێ-یە، ڕیزەكانی بزوتنەوەكەیان بەجێهێشتووە و كشاونەتەوە.
بەڵگەنامەكە ئەمڕۆ پێنجشەممە بڵاوكراوەتەوە و مێژووەكەی دەگەڕێتەوە بۆ 15ی ئەم مانگە، پێنج پەرلەمانتاری بزوتنەوەی ئیمتیداد ناو و ئیمزای خۆیان نووسیوە و كشانەوەیان لە بزوتنەوەكە ڕاگەیاندووە.
بزوتنەوەی ئیمتیداد نوێنەرایەتیی خۆپیشاندەرانی 2019ی عێراق ناسراو بە “شۆڕشی تشرین” دەكات و بەشێك لە كاربەدەست و پەرلەمانتارەكانی چالاكوان و نوێنەرانی خۆپیشاندەرانن. ئەو پێنج پەرلەمانتارەی بزوتنەوەكەیان بەجێهێشتووە پێكهاتوون لە محەمەد نوری، داود عیدانی، كازم فەیاز، نیدا گرێتی و نیسان زایر.
پێنج پەرلەمانتارەكە هۆكاری بەجێهێشتنی ڕیزەكانی ئیمتیداد دەگەڕێننەوە بۆ ئەوەی وەك خۆیان دەڵێن، “بزوتنەوەكە لە بنەماكانی تشرین لایداوە و ئەمینداری گشتی تاكڕەوانە بڕیاردەدات و بەبێ گەڕانەوە بۆ دامەزراوەكانی ئیمتیداد، بڕیاری چارەنووسساز دەدات”.
هەر ئەمڕۆ ئەمیندارێتیی گشتیی بزوتنەوەی ئیمتیداد، عەلا ڕكابی سەرۆكی بزوتنەوەكەی لە پۆستەكەی دوورخستەوە.
