وەزارەتی پەروەردەی عێراق، چەند بڕیار و ڕێنماییەكی لەبارەی كاری پەیمانگە ئەهلییەكانەوە دەركرد و دەڵێت، نابێت مامۆستای پیاو وانە بە خوێندكاری کچ بڵێتەوە و بە پێچەوانەشەوە.
لە نووسراوێكدا وەزارەتی پەروەردەی عێراق چەند بڕیارێکی سەبارەت بە پەیمانگە ئەهلییەکان بڵاوکردەوە و یەكێك لە بڕیارەكان ئەوەیە كە نابێت خوێندنی کوڕان و کچان لە هەمان کاتدا بێت و بە تێكەڵی وانە بخوێنن، بەڵكو لە كاتی وەرگرتنی وانە تایبەتەكان و خوولی هاوینەی پەیمانگەكاندا دەبێت كچان و كوڕان لە یەكتر جیابكرێنەوە.
بڕیارێكی تری وەزارەتی پەروەردەی عێراق، قەدەغەكردنی وانە وتنەوەیە بە خوێندكارێك كە لە هەمان ڕەگەزی مامۆستاكەی نەبێت و دەڵێت، “ئەگەر پەیمانگەكە تایبەت بوو بە كوڕان، دەبێت مامۆستای پیاو وانە بە خوێندكارەكان بڵێتەوە، بە پێچەوانەوە لە پەیمانگەی كچاندا نابێت مامۆستای پیاو وانە بڵێتەوە و دەبێت مامۆستاكان مێینە بن”.
بڕیار و ڕێنماییەكانی وەزارەتی پەروەردەی عێراق گشتاندنیان بۆ سەرجەم بەڕێوەبەرایەتییەكانی پەروەردە بۆ كراوە و جەختدەكاتەوە هەر پەیمانگەیەك سەرپێچیی ڕێنماییەكان بكات، بۆ ماوەی شەش مانگ دەخرێتەژێر سەرپەرشتیكردنی تایبەتەوە و لە كاتی دووبارەكردنەوەی سەرپێچییەكەدا مۆڵەتی لێوەردەگیرێتەوە و بە یەكجاری دادەخرێت.
