ڕووداوێكی تەقەكردن لە ئەمریكا كە پاڵنەرەكەی تیرۆر و ڕەگەزپەرستییە و سپیپێستێك ئەنجامیداوە، 10 كوژراو و سێ برینداری لێكەوتەوە كە سەرجەمیان ڕەشپێستن.
كەناڵی سی ئێن ئێن لە زاری دەسەڵاتدارانی شاری بوفاڵۆ لە خۆرئاوای نیویۆرك بڵاویكردەوە، بكوژەكە ناوی پایتۆن ئێس جێندرۆن-ـە كە تەمەنی 18 ساڵە و سپیپێستە، بە پاڵنەری ڕق و ڕەگەزپەرستی ئەو كارەی كردووە.
تەقەكەرەكە خەڵكی شارۆچكەیەكە بە ناوی كۆنكلین كە سێ كاتژمێر و 30 خوولەك بە ئۆتۆمبێل لە شوێنی ڕووداوەكەوە دوورە، بەڵام خۆی گەیاندووە بە شاری بوفاڵۆ بە دیاریكراوی ناوچەی ماستن پارك و كینگسلی كە زۆرینەی دانیشتووانەكەی ڕەشپێستن و لە گەراجی سوپەرماركێتێكدا دەستڕێژی گولـلەی كردووە و سێ كەسی كوشتووە و كەسێكی برینداركردووە، دواتر چووەتە ناو سوپەرماركێتەكەوە و دەستڕێژی گولـلەی لە نۆ كەس كردووە و حەوتیان كوژراون و دووانیان بریندارن و سەرجەمیان ڕەشپێستن.
بەپێی زانیارییەكان، بكوژەكە پێشتر تۆمەتبار بووە بە بڵاوكردنەوەی ڕق و كینە و وتاری ڕەگەزپەرستییانەی لە تۆڕە كۆمەڵایەتییەكاندا بلاوكردووەتەوە، كاتی ئەنجامدانی كردەوە تیرۆریستییەكەش خۆی پڕچەككردووە و تەنانەت كڵاوی سەربازی (خوودە)ی لەسەركردووە، هەروەها كامێرای لە خۆی بەستووە و تەقەكردن و كوشتارەكەی بە ڕاستەوخۆ پەخشكردووە.
