پۆلیسی هەولێر دۆزینەوەی ژنێك بە كوژراوی ڕادەگەیەنێت و هاوسەرەكەی وەك تۆمەتباری ڕووداوەكە ناودەبات.
بەڕێوەبەرایەتیی پۆلیسی پارێزگای هەولێر ڕایگەیاند، دوای ئاگاداركردنەوەیان بە بوونی ڕووداوێکی کوشتن لە (تەعجیلی نوێ) لە سنووری ناحیەی شەمامک، هێزەکانیان گەیشتنە شوێنی ڕووداو و دەرکەوت ژنێك بەناوی (ب. ز. ف.) تەمەن (33) ساڵ، کوژراوە.
دوای بەدواداچوون بۆ ڕووداوەكە، هێزەكانی پۆلیسی هەولێر لەماوەی كەمتر لە پێنج كاتژمێردا هاوسەرەكەیان بە ناوی (ا. ظ. م.) دەستگیركرد و بەپێی ڕوونكردنەوەی پۆلیس، لە ئاکامی ڕوودانی دەمەقاڵی لە نێوانیاندا لەسەر کێشەی خێزانی لێیداوە و دوای گەیاندنی بۆ نەخۆشخانە گیانیلەدەستداوە.
پەڕاوی لێكۆڵینەوە ڕێکخرا و پۆلیسی هەولێر دەڵێت، تۆمەتباری ناوبراو دەستبەسەرە.
