تەندروستیی سلێمانی ڕایگەیاند، لەسەر ڕاسپاردەی بافڵ جەلال تاڵەبانی هاوکاری و پێداویستیی پزیشکی بۆ ماوەی دوو مانگ بۆ سەرجەم نەخۆشخانەکانی سلێمانی دابینکران.
لە ڕاگەیەندراوێكدا بەڕێوبەرایەتیی گشتیی تەندروستیی سلێمانی ئاشكرایكرد، دوای نەمانی دەرمان و لێدانی زەنگی مەترسی لە ناوەندەکانی تەندروستیی سلێمانی لەوەی ئاستەنگی هەن و وەک پێویست خزمەتگوزارییەکان پێشکەش بە هاوڵاتییان و نەخۆشەكان ناکرێن، یەکێتیی نیشتیمانیی کوردستان لە کێشە و کەمیی پێداویستیی پزیشکی و دەرمانی كۆڵییەوە و لەسەر ڕاسپاردەی بافڵ جەلال تاڵەبانی، هاوکاری و پێداویستیی پزیشکی بۆ ماوەی دوو مانگ بۆ سەرجەم نەخۆشخانەکانی سلێمانی دابینکران.
جەختیشدەكاتەوە كە یەكێتی “بەردەوام هاوکار و هەماهەنگ بووە و پاڵپشت و پشتیوانی کەرتی تەندروستیی سلێمانییە و توانیویەتی ئەو کەلێنانە پڕبکاتەوە کە گرفتیان لەبەردەم خزمەتگوزارییە تەندروستییەکاندا دروستکردووە”.
