عێراق بە بەهای پێنج ملیار دۆلار چەكی كڕیوە و بەرپرسێك دەڵێت، “خۆمان لە ناوخۆدا چەك دروستدەكەین”.
محەمەد دەڕاجی، سەرۆكی دەستەی پیشەسازیی جەنگیی عێراق ئاشكرایكرد، لە ماوەی هەشت ساڵدا عێراق بە بەهای پێنج ملیار دۆلار چەكی لە وڵاتان و كۆمپانیاكانی جیهان كڕیوە.
جگە لە هاوردەكردنی چەك، عێراق لە ناوخۆدا چەك و تەقەمەنی دروستدەكات و كۆمپانیایەكی بە ناوی پیشەسازیی جەنگی هەیە و جۆرەها تەقەمەنی و چەكی سووك و مامناوەند و مووشەك دروستدەكات.
لەو بارەیەوە محەمەد دەڕاجی وتی، “ئاسایشی نەتەوەیی بە پیشەسازیی چەك و تەقەمەنی لە ناوخۆدا و بە خۆماڵیكردنی ئەو كەرتە دەستەبەر دەبێت، پیشەسازیی جەنگی سوودی خۆپڕچەككردن و ئابوری بە وڵات دەگەیەنێت و لە بری تەرخانكردنی پارە بۆ هاوردەكردنی چەك و كەرەستەی جەنگی، پارەكان لە ناوخۆدا دەمێننەوە”.
ئەو چەكانەی عێراق لە ناوخۆدا دروستیاندەكات، بریتین لە دەمانچە و تفەنگ و تەقەمەنی و بارووت، لەگەڵ مووشەكی كورتبڕ و بۆمبی تایبەت بە فڕۆكەی جەنگی لە جۆری سوخۆی.
