لە ئۆپەراسیۆنێکدا کە هێزەکانی دژە تیرۆری عێراق بە پاڵپشتی فڕۆکەکانی هاوپەیمانان لەکەرکوک ئەنجامیانداوە، توانراوە مۆڵگەیەکی چەکدارانی داعش لە ناوچەکانی زغەیتوون و خەناجری سەر بەناحیەی ڕەشادی قەزای حەویجەی سەر بە پارێزگای کەرکوک خاپوور بکەن.
بە پێی زانیارییەکان، ئۆپەراسیۆنەکە لە شەوی ڕابردوو تا بەرەبەیانی ئەمڕۆ بەردەوام بووە و وتەبێژی فەرماندەیی گشتیی هێزە چەکدارەکانی عێراق لەم بارەیەوە ڕایگەیاندوە کە لە ئۆپەراسیۆنەکاندا 16 چەکداری سەربە تیرۆریستانی داعش کوژراون کە بەشێکیان لە حەشارگەکانیان دابوون و بەشێکیان لە کاتی ڕاکردندا پێکراون.
ئۆپەراسیۆنەکە بە پشتیوانی ئاسمانی هێزەکانی هاوپەیمانان ئەنجام دراوە.
بە وتەی لیوا یەحیا ڕەسول لە ئۆپەراسیۆنەکەدا هەروەها دەستبەسەر چەندین چەکی سوک و مامناوەندی و بەڵگەنامەدا گیراوە.
لەلایەکی ترەوە سەرچاوەیەکی ئەمنی لەکەرکوک ڕاگەیاند، “گۆڕانکاری لەنێو هێزە عێراقییەکان لەکەرکوک ئەنجامدراوە و هێزەکانی لیوای 61 له نەخۆشخانەکانی نێو شاری که‌رکوک پاشەکشەیان کردووە و لەجێی ئەوانیش هێزه‌کانی پۆلیسی ناوخۆ چونەته شوێنه‌کانیان”.
