ڕاوێژكارێكی كازمی دەڵێت، یەدەگی عێراق لە دراوی بیانی 70 ملیار دۆلاری تێپەڕاندووە و تەنها مانگی ڕابردوو 11 ملیار دۆلار داهات هەبووە كە زۆرترینە لە ماوەی 14 ساڵدا.
موزهر محەمەد ساڵح ڕاوێژكاری مستەفا كازمی سەرۆك وەزیرانی عێراق بۆ كاروباری دارایی و ئابوری ڕایگەیاند، بانكی ناوەندی بڕی یەدەگی خۆی لە دراوی بیانی بەدەستهێناوەتەوە.
بەپێی وتەی ڕاوێژكارەكەی سەرۆك وەزیران، ئەو پارە یەدەگەی عێراق هەیەتی، سێ هێندەی ئەو قەرزە بیانییانەیە كە لای عێراقن و دەبێت حكومەت تا ساڵی 2028 بیانداتەوە.
لە ڕۆژانی ڕابردوودا وەزارەتی پلاندانانی عێراق ئاشكرایكردبوو، داهاتی مانگی ڕابردووی عێراق لە فرۆشتنی نەوت 11 ملیار دۆلار بووە و ئەوەش زۆرترین داهاتی مانگانەیە لە ماوەی 14 ساڵدا.
زۆربوونی یەدەگی عێراق لە دراوی بیانی بەهۆی بەرزبوونەوەی نرخی نەوتەوەیە و لە ماوەی چوار مانگدا سەرباری خەرجی، ئەو پارانەی پاشەكەوت كراون و وەك یەدەگ هەڵگیراون بڕەكەیان گەیشتووەتە شەش ملیار دۆلار.
