سەرۆکی گەورەترین پارتی ئۆپۆزسیۆن لە تورکیا کە وەک ناڕەزایەتییەک دژ بە گرانکردنی نرخی کارەبا پارەدانی بایکۆتکردبوو، ئەمڕۆ ڕایگەیاند کارەبای ماڵەکەی بڕدراوە.
پاش ئەوەی لە مانگی یەکی ئەمساڵەوە تورکیا زیادەیەکی زۆری خستە سەر مانگانەی کارەبا، خەڵکانێکی زۆر لە هاوڵاتی و خاوەنکار و کۆمپانیاکان زەرەرمەندبوون.
ئەم زیادکردنەی نرخەکان ناڕەزایەتییەکی زۆری لێکەوتەوە و چەندین کۆمپانیای بچوک، پسووڵەی پارەدانەکانیان بە جامی ئۆفیسەکانیاندا هەڵواسیبوو، وەک ئاماژەیەک بەوەی ڕەنگە ناچار ببن کارەکانیان ڕابگرن.
هەر لە سەرەتاکانی ئەمساڵدا، کەمال کلیچدار ئۆغلۆ سەرۆکی پارتی گەلی کۆماری پەیمانی دا پارەی پسووڵەکانی کارەبا نەدات، تا ئەو کاتەی حکومەت ڕێژەی زیادکراوی نرخەکەی لادەبات.
سەرۆکی پارتە ئۆپۆزسیۆنەکەی تورکیا لە تۆمارێکی ڤیدیۆییدا کە لە ئەژماری تویتەری خۆی داینابوو، ڕایگەیاند، “ئێستا لە هاوژینەکەمەوە هەواڵم پێگەیشت، کارەبای ماڵەکەمانیان بڕیوە”.
هەروەها ڕوونیکردەوە، دەیەوێت هاوهەوڵوێستی 3.5 ملیۆن خێزانی دیکەی تورکی بێت، کە لە ساڵی پێشووەوە بەهۆی پارەنەدانەوە کارەبایان لێبڕدراوە، چونکە “لە سێ ساڵی پێشوودا نرخەکان لە سەدا 400یان تێپەڕاندووە”.
