وەزیری دارایی عێراق بڕیاری حكومەت لەبارەی بەهای دۆلاری ئەمریكی بەرامبەر دینار ئاشكرادەكات.
عەلی عەلاوی وەزیری دارایی عێراق لە لێدوانێكدا كە میدیا عێراقییەكان بڵاویانكردەوە ڕایگەیاند، نرخی دینار بەرامبەر دۆلاری ئەمریكی سەقامگیرە و پێناچێت هیچ گۆڕانكارییەكی دیكە ئەنجامبدرێت.
وتیشی، “ساڵی ڕابردوو گۆڕانكاریمان ئەنجامدا، لە مەودای ناوەنددا گۆڕانكاریی دیكە ئەنجامنادرێت، دراوەكەمان سەقامگیرە و پێناچێت هیچ گۆڕانكارییەك بخرێتەڕوو. باوەڕی بەهێزمان هەیە كە دراوەكە گونجاوە و نرخیشی گونجاوە”.
كۆتایی هەفتەی ڕابردووش تەیف سامی، بریكاری وەزارەتی دارایی عێراق ڕایگەیاند، بەهیچ شێوەیەك بەهای دۆلار بەرامبەر دینار دانابەزێندرێت و ئەو دەنگۆیانەی لە تۆڕە كۆمەڵایەتییەكان سەبارەت بە دابەزاندنی بەهای دۆلار بڵاودەكرێتەوە هیچ بنەمایەكی نییە و دوورە لە ڕاستییەوە.
وتیشی ، “بەهیچ شێوەیەك پێشنیازی لەو شێوەیە نەكراوە بەهای دۆلاری ئەمریكی لە یاسای بودجەی 2022ی عێراقدا دابەزێندرێت و بەهای 100 دۆلار بكرێتەوە بە 120 هەزار دیناری عێراقی”.
حكومەتی عێراق لە یاسای بودجەی 2021 ی عێراقدا بەبیانووی كورتهێنان، بەهای دۆلاری بەرامبەر دیناری عێراقی بەرزكردەوە.
