بەهۆی برسیبوون و ئامادەیی زۆری خواردن و خواردنەوە شیرینەکان لەسەر سفرەی مانگی ڕەمەزان، ڕاگرتنی هاوسەنگیی کێش یاخود دابەزاندنی کارێکی ئاسان نییە.
بەپێی ڕاپۆرتێکی پێگەی “لایف سایەنس”، سیستمێکی خۆراکی هەیە کە یارمەتیدەرە بۆ دابەزاندنی کێش و هاوکارییت دەکات تاکو خۆت لە کێشی زیادە ڕزگاربکەیت.
ڕاپۆرتەکە جەختیکردووەتەوە، بۆ لەدەستدانی کێشی زیادە پێویستە پەیڕەوی سیستمێکی خۆراکیی ڕووەکی بکرێت، ئەمەش لە ئەگەری چەندین کێشەی تەندرووستیی وەک نەخۆشیی دڵ، بەرزبوونەوە و نزمبوونەوەی پەستانی خوێن، کۆڵسترۆڵ و شەکرە بەدوورتدەگرێت.
ئەگەر بڕیارتداوە سیستمی خۆراکیی ڕووەکی پەیڕەو بکەیت، ئەوا ڕەچاوی ئەم سێ ڕینماییەی خوارەوە بکە.
یەکەم: پێویستە پرۆتینی ڕووەکی بخۆیت، تاکو زیان بە تەندروستیت نەگات و تووشی لاوازیی ماسوولکە نەبیت.
بادەم و چەرەسات و پاقلەمەنییەکان دەوڵەمەندن بە پرۆتینی ڕووەکی و ناهێڵن هەست بە برسێتی بکەیت
دووەم: پێویستە گرنگی بە خواردنی ڕیشاڵەکان بدەیت، چونکە بە خێرایی لە گەدەدا هەرس نابن و بەهۆیانەوە بۆ ماوەیەکی درێژ هەست بە تێری دەکەیت، سەرچاوەی سەرەکیی ئەم ڕیشاڵانەش سەوزە و زەڵاتەن.
سێیەم: خۆت بەدووربگرە لە شیرینی و شەکر و زیاتر پشت بە میوە و شەربەتە سرووشتییەکان ببەستە.
