بەڕێوەبەرایەتیی پۆلیسی پارێزگای سلێمانی بڵاویكردووەتەوە، چوار كەس بە تۆمەتی فاڵگرتنەوە و نوشتە و فێڵكردن دەستگیركراون.
بەپێی ڕاگەیەندراوێكی بەڕێوەبەرایەتیی پۆلیسی پارێزگای سلێمانی تێیدا هاتووە، لە درێژەی هەڵمەتەكانی بەڕێوەبەرایەتیی پۆلیسی پارێزگای سلێمانی بۆ دەستگیركردنی ئەو تۆمەتبارانەی فێڵ لە هاوڵاتیان دەكەن لە ڕێگای نوشتەو جادوو و فاڵگرتنەوەوە لەلایەن بنكەی پۆلیسی سەراوە، چوار تۆمەتباری دیكە دەستگیركران و لە كاتی دەستگیركردنیشیاندا دەستگیرا بەسەر چەندین پارچە كەلوپەلدا كە بۆ فاڵگرتنەوەو نوشتەكردن بەكاریانهێنابوو.
لە ڕاگەیەندراوەكە هاتووە، بەبڕیاری دادوەر تۆمەتباران ڕاگیراون و لێكۆڵینەوەكان لەگەڵیاندا بەردەوامە.
جێی ئاماژەيە لە دوو ڕۆژی ڕابردوودا لەسەر هەمان دۆسیە نۆ تۆمەتباری دیكە لە شاری سلێمانی دەستگیركرابوون.
