لەگەڵ نزیکبوونەوەدا لە وەرزی هاوین و گەرما، تینوێتی ڕۆژووەوان زیاتر دەکات، چونکە ڕۆژووگرتن و گەرما دەبنە هۆکاری لەدەستدانی ئاو و تەڕایی جەستە.
ئەمانەی خوارەوە چەند ڕینماییەکی بەسوودن بۆ خۆپارێزی لە تینوێتیی مانگی ڕەمەزان.
ئاوخوارنەوە
ئاو سەرەکیترین خواردنەوەیە و جێگرەوەی نییە، پسپۆڕەکان ڕێنماییدەدەن ڕۆژانە یەک لیتر و نیو ئاو بخورێتەوە. ئەمە هەم جەستە چالاک دەکاتەوە و هەم ئەو خوێ و ئاسنەشی بۆ دەگەڕێنێتەوە کە لە پرۆسەی بەڕووژووبوونی ڕەمەزان و ئارەقدەردانی گەرمادا لەدەستیداوە.
دەتوانیت هەندێک پێکهاتەی تەندروست بخەیتە ناو ئاوی خواردنەوەکەتەوە، وەک قاژێک لیمۆ، چەند گەڵایەکی نەعنا یان هەندێک زەنجەفیل.
بەکارهێنانی جۆرەکانی تری خواردنەوە و شلەمنییەکان
ئەمە بەتایبەتی شەربەتە سرووشتییەکان دەگرێتەوە، باشتریش وایە خۆت لە خواردنەوە دەستکردەکان بەدووربگریت کە گاز و ڕەنگ و پێکهاتەی دەستکردیان تێدایە و ڕێژەی شەکریان بەرزە.
سەوزە
لە مانگی ڕەمەزاندا باشتر وایە سەوزە شەوان و پارشێوان بخورێت، چونکە ڕێژەیەکی بەرزی ئاو و ڕێشاڵیان تێدایە و ماوەیەکی زۆر لە گەدەدا دەمێننەوە، ئەمەش دەبێتە هۆی کەمکردنەوەی هەستکردن بە برسێتی.
خەیار بە باشترین جۆری سەوزە دادەنرێت کە لە تینوێتی بەدوورتدەگرێت و جەستە فێنکدەکاتەوە.
دواخستنی پارشێو
باشتر وایە پارشێو پاش نیوەشەو بکرێت، تاکو ڕۆژووەوان بەرگەی تینوێتی بگرێت. هەروەها پێویستە پارشێوان نانێکی قورس نەخورێت.
