خاوەن مۆلیدەكانی كۆیە دوای چەند ڕۆژێك لە دەستگیركردنیان ئازادكران.
لە شەوی پێنجشەممەوە 28 خاوەن مۆلیدەی ئەهلی لە كۆیە بەهۆی كوژاندنەوەی مۆلیدەكانیان دەستگیركران، ئەمڕۆش بەمەرجی کارکردن بە ڕێنماییەکان و نەکوژاندنەوەی کارەبا لەسەر خەڵک، ئازادکران.
لە ڕاگەیەندراوێكدا قائیمقامیەتی كۆیە ڕوونیكردووەتەوە، ئەو بەڵێننامەیەی بە خاوەن مۆلیدەکان پڕکراوەتەوە پێکهاتووە لە دوو بڕگە، یەکەمیان ئەوەیە کە نابێت هەركات بیانەوێت مۆلیدەكانیان بكوژێننەوە، دووەمیش ئەوەیە کە پێویستە پابەندی ڕێنماییەکان بن و لە ئەمڕۆوە کارەبا بدەنەوە بە هاوڵاتییان.
